بوغطاط المغربي يعلن تضامنه اللامشروط مع ربيع الأبلق.. باراكا من سياسة ” ألي سي إبراهيم”

تحية بوغطاطية للجميع،

1/ أنا بوغطاط المغربي، أعلن عن تضامني الكامل واللامشروط مع ربيع الأبلق.. أيبيه.. ربيع الأبلق ماشي وحدو وخاصنا بصح نكونو معاه ماشي ضدو ولكن ماشي بالهضرة والهاشتاغات.. و ماشي بشعار allez سي براهيم (الي ما عارفش الشعار غادي يلقي الفيديو فاللخر ديال المقال)

2/ الحقيقة لي كتزعج المرايقية والموزطمين، هي أن ربيع الأبلق ضحية سياسة “allez سي براهيم”. السياسة لي كيزيدو بها هاد المرايقية ربيع ولي بحالو إلى الهاوية، بعدما كيختاروهوم بعناية، لما تتوفر فيهم من معايير السذاجة والحماس ونقط ضعف أخرى، فالوقت لي نفس المرايقية كيضربو لكلامهم لحساب بالستنتيم والميلمتر

3/ نفس المرايقية والموزطمين، سواء لي عايشين فالمغرب ولا لي كاينين على برا، هما لي بقاو ينفخو فربيع وغيرو يامات أحداث الحسيمة، وبقاو كيوزعو عليهم فالألقاب، هادا زعيم، هادا قائد هادا دينامو وهادا صنديد… حتى تطورات الأمور وخرجت عن نطاق ما كانو يدعونه من سلمية واحتجاج من أجل مطالب اجتماعية وولات القضية فيها إدخال الأسلحة وإضرام النيران والرشق بالحجارة والعنف بشتى أنواعه وأشياء أخرى أخطر

4/ نفس المرايقية ما قالوش اللهم إن هذا منكر فاش كان ربيع الأبلق كيدير فيديوهات وهو مشعشع مكشكش كيحرض على استعمال العنف ضد القوات العمومية ورجال الأمن ووصل بيه التحريض إلى حد توعدهم بأن تحفر لهم مقابر جماعية في الريف… علاش ما شرحوش ليه بلي هادا ماشي نضال وإنما بلطجة وإجرام؟؟؟.. لاااا… بقاو عليه allez سي ربيع… حنا معاك… الموت ولا المذلة.. زيد عطيهم هادشي مايكفيهم (الصور من تقرير المجلس الوطني لحقوق الإنسان الصادر سنة 2020 بشأن احتجاجات الحسيمة)

5 / ونهار تحكم ربيع ب 5 سنوات حبسا نافذا بسبب هاد الجرائم الخطيرة، لقا راسو بوحدو… ونهار طلعات معاه البرودة ماقدرش يستحمل… وعيا ما يفكر، فالأخير مالقاش ملاذ آخر من غير ملك البلاد.

ملك البلاد لي وجه ليه خطاب استعطاف مخاطبا إياه بـ ” يا صاحب الجلالة وأمير المؤمنين “… وفأي مناسبة وجه هاد الرسالة؟؟ بمناسبة عيد العرش المجيد الله يخليك. تلك المناسبة التي يجدد فيها المغاربة التأكيد على الوفاء الصادق الذي يتبادله العرش والشعب، وتجديد العهد المقدس الذي يلحم بينهما بأواصر البيعة الشرعية المتجذرة منذ قرون

6/ ولي عمرو شاف كيفاش كيتكتبو رسائل طلب العفو من الملك، ها هو نموذج لي كان كتبو زكرياء مومني وتمعنو فيه مزياااان تشوفو كيفاش كيخاطبو ملك البلاد

7/ صدور العفو الملكي كيف كيعرف كولشي ما عمرو كان تبرئة من الجرم المرتكب، بل على العكس من ذلك فهو عفو بعد الإقرار والاعتراف بالذنب. وماشي بعيد شي نهار نطيحو فالرسالة لي كتبها ووقعها ربيع بنفسو إلى “جلالة الملك وأمير المؤمنين” ونشوفو الفرق الشاسع بين ربيع لي شاد الأرض وطالعة معاد البرودة وربيع لمجفجف لي كيكون فحالة غير طبيعية

8/ ربيع نهار خرج من الحبس مالقا حد يعاونو ولا يوقف معاه ولكن بانت ليه الدولة هي الملاذ الوحيد لي خدا من عندها 10 ديال المليون فإطار المبادرة الوطنية للتنمية البشرية باش يدير مشروع ياكل منو طرف ديال الخبز ويبدأ حياة جديدة، قبل ما يزيغ ويغرو الشيطان ويمشي فطريق الإدمان على المخدرات الصلبة لي ضيع فيها لفلوس لي خداها من ميزانية دافعي الضرائب، ومالقاش دوك المرايقية يوقفو معاه ويقولو ليه أودي هادشي لي كادير ماشي معقول

9/ بالعكس… نفس المرايقية والموزطمين لي كانو سامحين فيه نهار كان هو كيتخبط فمعاناتو مع إفلاس مشروعو التجاري بسبب الإدمان، هما نفسهم لي رجعو عندو يغرقوه تاني فاش شافوه رجع للتجفحيف والدخول والخروج فالهضرة وبقاو عليه تاني allez سي ربيع… زيييدهم وعطيهم هادشي ما يكفيهم… لأن بالنسبة ليهم ربيع مجرد بريكول ينعشو بيه الحركة… باش تبدا تسمع منبعد… مسكيييين ربيع طحنوه ب 4 سنوات حيث نطق بالحق… لك الله يا وطني…

10/ فبالله على كل من يحاول أن يصور المغرب بحال شي جحيم وبلي ولي دوا يرعف… واش من نيتكم؟؟ شحال من واحد كيقيل ينتقد فالنظام وفالملكية براسها… أشمنك يا تدوينات ومقالات ولايفات فيوتيوب وسبيسات فتويتر وحلقات المغرب في أسبوع والمغرب في شهر وحصيلة الحكم وواقع السلطوية وزيد وزيد… واش شي نهار تعتقل فيهم شي حد أو مجرد توجهات ليه شي استدعاء للقضاء أو الأمن؟؟ اللهم إيلا كنتو غا تقولو هادو خدامين مع المخزن ومندسين بحال كيف كيقولو شي وحدين… الله واعلم

11/ الحقيقة ببساطة أن هادو عارفين مزيان آش كايديرو وعارفين بأن هاد لبلاد عمرها وما عمرها غادي تمنع ولادها أنهم يعبرو وينتقدو… ولكن الانتقاد ماشي هو السب والقذف وتقول منبعد حرية التعبير. وإيلا كانت بالنسبة ليك هاديك حرية تعبير، مالك لي مكاتعبرش بديك الطريقة وبنفس الأسلوب؟؟ حيث عارف أنك عتكون مخالف للقانون وعاتجيبها فراسك.. ولكن حيث الأمر ماكايتعلق بيك فالدنيا هاااني .. زيد زطم باباه و غد ليه أجي غوت قدام المحكمة ولقا ليه ألف عذر وعذر..

12/ دوك الأعذار لي ماكيتلقاوش فالدول لي كيطلو يستشهدو بها على أنها مرجع فالديمقراطية واحترام حقوق الإنسان وحرية التعبير. فمثلا فإسبانيا، رغم أن الملكية فيها رمزية والملك فيها يسود ولا يحكم، إلا أن القانون فيها كيجرم الإساءة للملك والإخلال بالاحترام الواجب ليه. بحال لي وقع مع الرابور بابلو هامل لي تعتاقل وتسجن بسبب تغريدات أساء فيها للملك، وحتى الغرامة لي حكمو عليه بها، نهار ما خلصهاش صدرو قرار بالحجز على ممتلكاتو وفاش مالقاو عندو والو، السيد لقا راسو عيدوز فالحبس كثر من داكشي لي تحكم عليه إلى حين يخلص لي عليه… ولكن هادي ماشافوهاش

13/ ففرنسا كذلك لي رغم أنها جمهورية، إلا أن الإساءة إلى رئيس الجمهورية كيعاقب عليها القانون كيف كيعاقب على الإساءة لرجال السلطة. ونهار واحد الأستاذة من حركة les gilets jaunes بقوة الجعرة والإحساس بالحكرة، طالبات فواحد المظاهرة بإسقاط ماكرون، السيدة توبعت أمام القضاء وأدينت بالحبس، بعدما تم تكييف العبارات المستخدمة من طرفها على أنها تهديد وتحريض ضد حياة الرئيس. وهي بنفسها أقرت من بعد بأن متظلماتش وبلي كانت غالطة ومكانتش كتقصد تهديد أو التحريض ضد الرئيس وبلي معرفاتش تختار المصطلحات وقالت بلي ندمات على داكشي.. ولكن حتى هادي ماشافوهاش

14/ لكل هذه الأسباب، أنا بعدا شخصيا أتضامن مع ربيع الأبلق وغادي نبقا ديما متضامن معاه كيفما أعلنت من قبل عن تضامني مع سعيدة العلمي ومحمد بوزلوف وغيرهم لي كنعتابرهم ضحايا سياسة allez سي إبراهيم، ولي كيتحولو منبعد لسلعة يتاجر بها كل من هب ودب وكل من له مصلحة في تصفية حسابات ضيقة أو يريد تصريف حقده ضد الدولة… لكل هؤلاء كنقول اتقوا الله وباراكا من تبياع لعجل وبااراكا من سياسة allez سي إبراهيم وفيييقو من الكلبة الله يرضى عليكم… كان معكم بوغطاط المغربي من حيث لا تدرون